Schau mer mal

Guata Morga liabi News-Erpichta

han denkt hüt tuan i wiederamol dichta

As isch Fritig, das isch dr Hit

ok, zerscht no uf t'Woog, du huara Shit

I muass es aimol meh überstoh

wia jeda Fritig uf t'Woog ufastoh

A Blick uf dia letscht Wucha zeigt gat a paar Problem

i glaub hüt wird dr Gang uf t'Woog sehr unbequem

Agfanga hät's bim Alass fum Departement

trunka hemmer, ghessa und au viel Lüt kennaglernt

A Buffet hät's ghe mit köstlicha Sacha

gat a paar Gäng zum Buffet han i do müassa macha

Z'viel Flüssigs in Form fu Bier und Wii

z'Resultat sind am Fritig ganz klini Äugli gsi

Denn am Samstig no Unihockey-Turnier fur Schual

und i z'mitzt dina als Coach uf em Stuahl

Nach jedem Sieg hends miar uf t'Schultera klopft

fur luter Freud jedesmol a paar Gummibärli inagstopft

Am Obig denn viel z'viel Rösti mit da Lehners verspiisa

döt han i schu gwüsst, das git a Riesakriiisa

Am Suntig isch's no viel gröber worda

z'Meridali Geburifest, klar das i do überborda

T'Sinaida wieder viel z'guati Küacha bacha

i und uf Küacha verzichta, haha, das i nit lacha

Fläschkäs hend t'Rofflers nit u viel ghessa

Dr Rest han i denn gno, so richtig verfressa

Egal, unter dr Wucha tuan i denn wieder uu guat luaga

und miar dr Weg am Ungsunda vorbi pfluaga

Klappt hät au dä Vorsatz nit ganz immer

Aber nach em Wuchaend hät's nüm könna kho schlimmer

Ab etz uf t'Woog, mach kai riesa Spektakel

denn isch's vorbi, das Riesadebakel

100 Gramm meh sind's worda am Schluss

vorbi etz mit Süassem und anderem Stuss

Nögscht Wucha wird aimol meh alles guat

iar gsehnd, verlora han i na no nit, mina Muat

Etz muass es nämmli würklich aba mim Gwicht

mit dena Wort schlüss i hüt mis Gedicht