Drei Mönet isch’s här, a kurzi Zyt
Mini Liibli sind kurz gsi und t’Hosa wiit
As Projekt han i kha, as Sixpäck hät’s sölla sii
Viel verzichtet han i und Isatz zeigt dabii
Drum han i denn au verlora viel Fett
Und Muskla gwunna, ach wia nett!!
Doch nocher isch’s in t’Feria ghanga
Döt han i huara viel Fehler beganga
Glace ghessa und viel z’viel Pizza ghessa
Guatzli inabignet, gsoffa und nur umagsessa
Gummibärli han i gat handvoll gno
Rückwirkend betrachet kann i’s nit verstoh
Han gsündigt und nit gseh dia Gfohr
Aifach nur denkt “Isch jo nur aimol Feria im Johr“
Zruckkho in Chur und gat so witergmacht
Am Churerfest gat amol duuragmacht
1. August, Geburtstäg, aswas isch immer gsi
Alkohol, Süasses und viel Essa aifach immer dabi
Isch jo egal, bald kunnt dr Schnee
Denn tuat unter em Pulli niamerd min Ranza gseh
Doch leider viel z’viel Sünda beganga
Dia Hosa sind miar doch vor drei Mönet no ghanga?!
Und wieso kriag i dia kaiba Hemder nümma zua
Hät t’Sinaida dia in da falsch Wösch inatua??
As tönt zwor gar nit huara nett
Aber i gibas zua, i bin jetzt fett
Uf t’Woog han i mi schu lang nüm getraut
Han dr Weg döt hi mit viel Lego verbaut
Aber nögscht Wucha git’s kai Usreda meh
I werda dr beschwerlich Weg uf mi neh
Vorbi mit Usreda, Usazögera und dena viela Sünda
I tuan mi mim Hulki-Ken gat wieder verbünda
Dr Kampf gäga t’Kilo wird wieder ufgno
Und all dem Süassa werdi widerstoh
Au wenn’s mim Summer-Sixpack nit klappet hät
Mima Sixpack Skifahra isch doch au nett
Keine Kommentare:
Kommentar veröffentlichen