Samiklausgedicht

Samiklaus du liaba Ma

I hetti halt schu gära a Sixpack kha

Drum han i’s das Johr au probiert

Han ganz gsund ghessa und viel trainiert

Glanget hät’s am Schluss denn nit

Aber han viel abgno, au kai Shit

Zwüschetdina sinds 73 Kilo gsi

Doch die Zyta sind lang vorbi

Im Summer viel ghessa und spot go penna

Du wirsch das sicher fum Schmutzli kenna

Tüan iar im Scaläratobel au viel trainiera?

Oder sinder dia ganz Zyt am Säckli präpariara?

Wia lebt sich’s aigentlich so als Klaus

Lebend iar gsund oder in Saus und Braus

T’Mandarinli wärend jo ganz gsund

Doch iar triibends drnäbed sicher bunt

Glüahwii trinka tagein- tagaus

Do stiigend sicher rechti Partys liaba Klaus

Denn all dia Nüssli wo iar tüand essa

Mim Lebkuacha isch’s sicher au nit z‘knapp bemessa

Und all dia Schoggi wo immer uma isch

Will gar nüt wüssa fu da Guatzli uf em Tisch

Über t’Summerfigur müand iar eu macha kai Gedanka

Eu gset ma jo selta ir Badi am Sunna tanka

Aber dr Schmutzli hät sicher rechti Mucki

Isch sicher so stark wia dr Christian Stucki

Dä muass jo immer t’Säckli träga

Und z’ganza Johr dr Esel pfläga

Tuat dä öppa Crossfit macha

Oder Guatzli paleo-mässig bacha

Trainiert är echt bim Heinz Tae Bo

Filicht tuat är aber au uf Cardio stoh

Diar Klaus isch das glaub nit so wichtig

Dis Sixpack hät a Fettbeschichtig

Din Buuch dä khört halt au zu diar

So wia dr Sack, dr Schmutzli und dia viela Tier

Gnüss hüt din Tag, isch jo bald wieder vorbi

Und filicht häsch hüt Obig jo glich a Sixpack für mi dabi